UIT die aard van my werk, is ek bevoorreg om gereeld nuwe produkte te ontvang en uit te toets. Dis lekker, maar die lekkerste is om vir ander vroue daarvan te vertel. Of as iets nie vir my werk nie, dit aan te gee na ‘n vriendin om te sien of haar vel en voorkoms daarby baat vind.
Maar daar is produkte wat nêrens heen gaan nie. Ek druk die buisies leeg, sny die onderkant af, steek ‘n wattestokkie in en delf die laaste druppel daarvan uit. Of ek skraap met my vingers die bodem van die potjie blink.
Wil julle weet watter produkte het ek sover hierdie jaar gebruik tot die laaste druppel toe? Natuurlik wil julle. Want dit is die soort produkte wat vir my wonderlike resultate gelewer het en wat ek sonder huiwering uit my sak sal koop. Dis nou te sê, as my beursie nie te plat is nie!
Meno-Glow en Hernuvin
Elders op die blog skryf Toni Younghusband, my voormalige redakteur by SHAPE Magazine, oor haar ervaring met borskanker en hoe Hernuvin se reeks produkte haar gehelp het met tipiese velprobleme wat met intensiewe chemoterapie gepaard gaan.
Hernuvin is spesiaal geformuleer is deur die plastiese chirurg en navorser, Dr Hugo Nel, nadat sy narkotiseur, Dr Marna Kühn, borskanker gekry het en hom gevra het of hy dan nie in sy laboratoriums ‘n produk kan formuleer om haar te help met die ingrypende velskade en haarverlies ná chemoterapie nie. (Dr Nel is ook die skepper van die vermaarde Optiphi velsorgreeks, wat hier en oorsee gesog is.)
Hy het nie vir ‘n oomblik gestuit voor die uitdaging nie, en die resultate is Hernuvin.
Dit het egter nie daarby gebly nie. Daar is baie ooreenkomste met ‘n menopousale en post-menopousale vel en die velprobleme wat kankerbehandeling kan meebring. Dit sluit onder meer droogheid, sensiwiteit, dowwe, lewelose vel en stadige selhernuwing (kollageenvorming) in, asook haarverlies.
En so word Meno-Glow gebore – een van die beste plaaslike reekse wat ek in ‘n lang tyd op die proef gestel het. Die reeks bestaan uit ‘n reinigingsjel, retinol serum, oogroom, bevogtiger, sonroom, handeroom, jelmasker en kopvelserum. Dr Nel glo nie aan velverfrisser nie – die reinigingsjel doen sommer die verfrisser (toner) se werk ook.
Ek was maar skepties oor die bevogtiger, wat vir my effens dun gelyk het en nie ryk genoeg vir my vel nie. Wel, ek moes my bedenkinge sluk: My vel het gegloei, en hidrasie was fenomenaal.
Die reeks is aanlyn beskikbaar, en ook by sekere velsorg terapeute soos Skin ID en die pryse laat nie ‘n mens se oë water nie. Ek het meer as 3 maande uitgekom met my voorraad en dit tot die laaste druppel toe gebruik.
My betroubare Skin Logic meter vertel die storie: Ná ‘n maand se gebruik was my vel se voggehalte 46%, die olievlak 23% en my vel se elastisiteit het ‘n glimlag gesiggie gekry.
So lyk die Hernuvin-reeks, wat by onkoloë en sekere dokters te kry is.
Exuviance en Neostrata
Ek is ‘n groot aanhanger van die Amerikaanse Neostrata en Exuviance-reekse, wat deur Genop in Suid-Afrika bemark word. Dit is ‘n salonreeks van dermaseutiese produkte.
Ek het die Exuviance Total Correct Wash, Neostrata Glycolic Renewal Serum, Exuviance Age Reverse Day Repair SPF30 en Exuviance Total Correct Night vir meer as twee maande gebruik.
Só in my noppies was ek met hoe my vel gevoel en gelyk het, dat ek die buisies onder oopgesny het om tot die laaste bietjie uit te kry. Die Exuviance reiniger is ‘n fyn skuim wat die vel ook sagkens skilfer (exfoliate). Dit is seepvry en verwyder selfs dik grimering en maskara. Jy het nie ‘n verfrisser nodig ná hierdie reiniger nie, want die vel se pH-vlak is reeds korrek – dis hoekom die reeks Total Correct heet.
Die Neostrata serum het beslis my vel gehelp om fyner en stralender te laat lyk. Ek het dit soggens en saans gebruik.
Ek is ‘n “sucker” vir ‘n veeldoelige dagroom – die Exuviance Age Reverse Day Repair, met ‘n breëspektrum SPF30, beskerm, verferm, beveg vrye radikale danksy anti-oksidante in die formulering en teiken oneweredige velkleur en pigmentasie.
Die dagroom van Exuviance Age Reverse bevat ‘n breëspektrum sonskerm. Die verferm die vel, teiken pigmentasie en beveg fyn lyne en plooie.
Ek was dol oor die Exuviance nagroom. Nagrome kan soms dik en taai voel, maar hierdie room is super absorbeerbaar en my vel het in die oggend verfris en jeugdig gelyk.
Dié produk-kombinasie was ‘n groot wenner in my boek, en my meter het bevestig die resultate was puik.
NUXE Merveillance LIFT
Die Franse NUXE produkte is al jare ‘n groot gunsteling op my rak. Al hul reekse is lieflik en veral hul fyn olie vir gesig, hare vel, het ‘n wêreldwye aanhang. Ek is nooit sonder ‘n bottel daarvan in my reistassie nie.
Maar noem die woord “Lift” en my ore spits dadelik. Ek is in daardie jare waar dit die soort aksie is waarvan ek baie hou.
Ek was dus baie gretig om hul nuwe, pragtig verpakte Merveillance LIFT reeks vir ‘n ouer vel te probeer. Die doel van die reeks is om verslapte vel fermer te maak. Dit bestaan uit 5 produkte: ‘n olie-serum, dagroom (een vir normale en ‘n ryker een vir droë vel), nagroom en oogroom.
Die produkte bevat mikroskopiese varswater groen-alg olies en ‘n minimum van 96% natuurlike bestanddele/ Die tekstuur is hemels en danksy subtiele geure van magnolia, freesia en wit muskus ruik dit ook hemels.
NUXE is bekend as ‘n voorste Franse “apteek” naam en alles wat uit hierdie stal uit kom, imponeer my. Dit lyk fantasties, dit ruik fantasties en dit werk fantasties. Dit is vegan-vriendelik en ‘n “skoon” produk.
Die groen alg (chlorella vulgaris) in die produk het 2.5 miljoen jaar gelede die eerste keer op die planeet verskyn en oorleef tot vandag toe danksy hul vermoë om bykans enigiets te weerstaan met ‘n membraam ryk aan molekules wat so ondeurdringbaar is dat nie eens virusse dit kan penetreer nie. Hulle regenerasievermoë is verstommend – elke dag gee dit geboorte aan vier nuwe selle.
Die dagrome bied ‘n keuse: Firming Powdery Cream wat die vel fermer maak en plooie sagter laat vertoon danksy ‘n poeieragtige formule wat plooie as’t ware “opvul”. Ideaal vir normale en kombinasie- veltipes.
Firming Velvet Cream is ‘n ryk dagroom wat eweneens die vel fermer maak en plooie help versag, terwyl dit die vel se soepelheid en tonus versterk. Dit is geskik vir normale tot droë veltipes.
Ek was gek na die Firming Activating Oil-serum. Jy het net 3 druppeltjies nodig vir jou gesig, nek en hals. Ek is ‘n groot aanhanger van vel-olies, en ‘n serum-olie pas my soos ‘n handskoen. Die olie bevat kragtige aktiewe bestanddele om fermheid en tonus te herstel.
Ek kon nie glo hoe vinnig die Lift Eye Cream resultate toon nie. Dit het ‘n “blur” effek vir plooierige ooglede, wat lyntjies, pofferigheid en kringe onmiddellik versag en die oogkontoer binne een maand fermer laat vertoon terwyl dit ‘n oplig-effek op die ooglede het.
Die Concentrated Night Cream bevat sterk teenverouderingselemente wat die vel se sel-energie oornag herlaai sodat dit soggens lyk of jy ‘n ekstra paar ure se slaap ingekry het.
Skaf gerus die NUXE jade gesigroller aan vir selfs beter resultate danksy die stimulasie van bloedsomloop en gesigspiere sowel as energie-drukpunte.
Vir hierdie reeks sal ek beslis ook my sak skud, en dit help dat dit nie peperduur is nie. Beskikbaar by Foschini’s en aanlyn.
